தமிழ்நாடு சட்டமன்றத் தேர்தலுக்கான வாக்கு எண்ணிக்கை நாளை நடைபெற உள்ள நிலையில், பட்டுக்கோட்டை தொகுதியின் முடிவுகள் அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளன. குறிப்பாக, தொகுதியில் நிலவும் பலமுனைப் போட்டியால் வெற்றி யாருக்கு என்பதைச் சற்றும் கணிக்க முடியாத அளவுக்குக் கடும் இழுபறி நீடிக்கிறது.
இந்தத் தேர்தலில் மிக முக்கியத் திருப்பமாக, தமிழக வெற்றி கழகம் இளைஞர்கள் மற்றும் பெண்கள் மத்தியில் கணிசமான ஆதரவைப் பெற்றுள்ளது. புதிய வாக்காளர்கள் மற்றும் பெண்களின் வாக்குகள் பெருமளவில் தவெக-வுக்குச் சென்றிருப்பதாகக் கள நிலவரங்கள் தெரிவிக்கின்றன. இந்த எதிர்பாராத வாக்குச் சிதறல், பட்டுக்கோட்டையின் பாரம்பரிய அரசியல் கணக்குகளை முற்றிலுமாகப் புரட்டிப் போட்டுள்ளது.
தவெக பிரித்த இந்த வாக்குகளால், திமுக வேட்பாளர் கா. அண்ணாதுரை மற்றும் அதிமுக வேட்பாளர் சி.வி. சேகர் இடையேயான நேரடிப் போட்டி தற்போது யாருக்குச் சாதகம் எனச் சொல்ல முடியாத அளவுக்குக் கடினமாகியுள்ளது. இதற்கு நடுவே, அதிரை கவுன்சிலர் சரீப் சுயேச்சையாகப் பிரித்துள்ள வாக்குகளும் வாக்கு எண்ணிக்கையில் பெரும் தாக்கத்தை ஏற்படுத்தும் என எதிர்பார்க்கப்படுகிறது.
இளைஞர்கள் மற்றும் பெண்களின் வாக்குகள் ஏற்படுத்தியுள்ள இந்தச் சலசலப்பால், பட்டுக்கோட்டையின் அடுத்த எம்.எல்.ஏ யார் என்ற கேள்விக்கு நாளைய வாக்கு எண்ணிக்கை வரை விடை கிடைக்காது என்பதே தற்போதைய நிதர்சனம். முடிவுகளை அறிய காத்திருப்போம்.
